Жаңа 62-1 тармақтағы «1.1 жол таңбасымен бөлінген екі жолағы бар екі бағытты жолда және (немесе) 3.20 белгісі (басып озуға тыйым салынады) қойылған жолда ережеде көзделген жағдайларды қоспағанда, қарсы бағытқа шығуға болмайды» деп белгіленген жол ережесі бір аптадан кейін күшіне енеді.
Әкімшілік кодекстің 596-бабы 3-тармағында «жол ережесімен тыйым салынған жағдайда, жолдың қарсы қозғалысқа арналған бөлігімен жүрсе (кері айналу немесе бұрылу үшін шықса), 6 ай мерзімге көлік басқару құқығынан айырылады».
Естеріңізге сала кетейік, 1.1 жол таңбасы — бүтін сызық, 3.20 белгісі — «басып озуға тыйым салынады». Ережеге сәйкес, оларды қауіпті жерлерге орнатады: көтерілетін немесе түсетін жерлерде, күрт бұрылыстарда. Жолдардың көрінуі шектелген учаскелеріне немесе қиылыстарға немесе жаяу жүргіншілер өткеліне орнатады. Статистикаға сүйенсек, елді мекендерге қарағанда жылдамдық әлдеқайда жоғары трассада басып озу ережелерін бұзу адам өліміне әкелетін апаттардың басты себебі болып, жылдан жылға артып келеді. Өзгеріс ең алдымен ереже бұза отырып көлікті жылдам жүргізетіндерді тоқтатуға және жүргізуші мен адам өмірін сақтауға бағытталған.
Жүргізуші куәлігінен айырылатын екінші топ — кептелісті айналып өту үшін тар көшеде қарсы бағытқа шығатындар. Мұндай асығып жүретіндер заңға бағынатындарға кедергі келтіріп қана қоймай, ауыр зардаптарға әкелетін жол апатын тудырады.
Қандай жағдайда бүтін сызықты кесіп өту үшін жаза жоқ
Жаңа 62-1-тармақта, жоғарыда айтылғандай, «ережеде көзделген жағдайларды қоспағанда» бір бүтін сызықты кесіп өтуге болмайды деп көрсетілген. Бұл қандай жағдайлар? «Жол таңбасы және оның сипаттамалары» бөлімінде «кедергіні айналып өту кезінде бұл ережені қолданбай әрекет ету мүмкін болмаса, 1.1 жол таңбасын кесіп өтуге рұқсат етіледі» делінген.
Жол ережесінің 1.39-тармағында «жүруге кедергі — осы жолақ бойымен жүруді жалғастыруға мүмкіндік бермейтін жүру жолағындағы қозғалмайтын объект. Кептеліс немесе осы жүру жолағында Қағидалардың талаптарына сәйкес тоқтаған көлік құралы кедергі болып табылмайды». Сондықтан бір бүтін сызықты басып озу арқылы кептелісті айналып өтуге болмайды, бірақ құлап түскен тасты айналып өтуге болады.
Комментариев: 0